خــــــــــــــــــــــــــــاص
مع المـــــــــــــــــــــالكي
انا :ابو اسراء العالم كلها ماراضية عليك العدو والصديق,,
المالكي: ياجماعة الخير. شمسوي,؟ حط ذنبي بيدي؟
انا : يعني معقوله 3 محافظات دولة مستقله, و3 محافظات متمرده. الامن صفر . الاقتصاد فافون, الــــخ.المتقاعدين يبچون. العسكريين بالظيم, الميزانيه شوكت المشاريع نازله. الفساد صاعد!! أدري انته شنهو شغلك.؟
المالكي: ابو عليوي, انت وين نايم؟ يعني ماتشوف البرلمان معطل تسليح الجيش شچم سنه , العراقية يگولون يستهدف السنة, والاكراد يخافون من عودة ربع صدام, وجماعتنه يريدون يبوگون براحتهم. أمريكا ماتريد عراق قوي, العرب يراهنون على عودة الوضع اللي نعل والديهم گبل,, تدري حتى دوله بأفريقيا اللي منها اللاعب (ملا) الها حزب بالعراق... شسمها؟
انا: الكامرون,,
المالكي: الله يذكرك بالشهادة,,اي هيه,
انا: زين انتم مو أغلبيه بالبرلمان وأغلبية بالشعب وبالحكومه,, ليش ما تتوحدون,, مو الوادم لاعبه بيكم طوبه,, شابعه بيكم شتايم.
المالكي: خويه ابو علاوي ,, زين شتسوي بخنجر قطر وسيف الكويت؟
انا: گلي بيهم وانا أطيح حظهم..
المالكي : اگلك بس لا تجيب طاريي؟؟:
:
:
:
:
:
أم عليوي!!!!!! هاي شبيك تصيح وذاب غطاك وتدردم.. العفو ام علاوي چنت اتحلم..
بس أكيد راح يگلي ميسي ورونالدو
:
١شباط ٢٠١٤
ليست هناك تعليقات:
إرسال تعليق